جيلبريك "checkra1n" الثغرة للي صدمات شركة ابل لي سميتها (checkm8)

موضوع اخر مشحر والله 
____
بما ان الموضوع ديال "الجيلبريك" كان فيه تفاعل وكاين ناس مهتمين بهاد النوع ديال المواضيع بخصوص اجهزة ابل ، 
اليوم جبت لكم موضوع اخر ،
____
اليوم اسيدي غادي نهضرو على جيلبريك "checkra1n" و الثغرة للي صدمات شركة ابل لي سميتها (checkm8) 
المهم كيما قلت فالموضوع للي قبل، بلي "الجيلبريك" يمكن ليه يكسر حماية النظام ديال اجهزة ابل (ايفون- ايباد- ايبود) 
ولاكن شركة ابل عندها حل الا وهو تخرج تحديث جديد ،،، لنفترض نتا عندك فالايفون الاصدار 13.5 والمطورين خرجوا "الجيلبريك" لهاد الاصدار ،  فاش ابل غادي تخرج تحديت جديد مثال "13.5.1" غادي يكونو حلو المشكل ، الان الثغرة هيا ثغرة فالنظام فقط ، والنظام راه يمكن تحديثه و اصلاح المشاكل ، هاد الثغرة للي كيلقاوها  المطورين كيتلقو عليها اسم (0Day)
_____
دابا اراك المشحر 
العام لي فات وقعات واحد الروينة فعالم "الجيلبريك" وكولشي مطلعها على شركة ابل علاش ؟ 
واحد الباحت امني ملقب بـ (axi0mX) لقا واحد الثغرة طلق عليها اسم (checkm8)  هاد الثغرة مكايناش فالنظام ،  كاينا فالمعالج  الله الله يا ابل ، شنو معنى كاينا فالمعالج ؟ 
يعني هيا ثغرة فالهاردوير ماشي السوفتوير ،  نزيد نشرح باش تفهمو ،  الثغرة للي كتكون فالنظام يمكن لشركة ابل تعالجها لانها هيا كتحكم فالنظام ولاكن اصاديقي الثغرة فاش تكون فالمعالج نننننن ههه الى بغات ابل تحل المشكل خاص تجمع گاع الايفونات ديال العالم وتحلهوم وتبدل المعالج  ايه اسيدي و الله الى بهاد الفهوم بالظبط ، 
نكملو فالثغرة ،  
_____
بما انها تغرة امنية كاينا فجدر ديال النظام وكتسمح للمطورين الوصول العميق للنظام بالكامل ، لان هاد الثغرة كتستغل الشفرة الاولية لي كاتكون ف الإقلاع ديال الايفون (الاقلاع هيا فاش كتشعل الايفون كتم عملية الاقلاع BootRom) يعني  فاش كتشعل الهاتف هاذ الثغرة كتستغل الامن والحماية ديال النظام قبل مايشعل ، 
________ 
شنو تقدر دير بهاد الثغرة !
 1- عمل جيلبريك لي هوا اصلاً كاين سميتو (checkra1n) وحريرتو حريرة غادشي نرجعو ليها ههه
 2- تخطي الايكلود يعنى مع هاد الثغرة تقدر تخطى ايكلود للايفون بس  خاص الايفون دياك يكون ضمن الأيفونات للي فيهم هاد ثغرة )checkm8)  وغاندي نكتب ليكم الهواتف للي فيها هاد الثغرة، 
__________
 دبا نرجعو لجيلبريك checkra1n هاد الجيلبريك تم الاطلاق ديالو مورا ثغرة checkm8  بأشهر قليلة من نفس الباحت الامني معه شي 25 هاكرز اخرين الأباطرة فعالم الجيلبريك ، لان هاد الجيلبريك كيخدم بديك الثغرة الامنية ..شنو الفرق بين هاد الجيلبريك "checkra1n" ودوك الجيلبريك الاخرين للي شرحت فالموضوع للول؟؟؟  باش تعرف الفرق غادي نعاودو نرجعو للموضوع ديال ثغرة فالنظام و ثغرة فالمعالج ،  
_____________
الجيلبرك للي شرحت فاللول كيعتمد على ثغرة فالنظام، يعني يمكن تدير جيليريك على حساب الاصدار لي عندك نتا كين إصدارات كتدعم الجيلبريك وكين اصدارات لا ، 
 لاكن هاد الجيلبريك )checkra1n) كيعتمد على المعالج يعني نوع الهاتف فقط و الاصدارات لا تهم حتى لو خرجات ابل اصدار ios 100 ، بمعنى انا الهاتف ديالك الى كان كيدعم ثغرة checkm8 يعني تقدر تدير ليه جيلبريك checkra1n ، وهنا الى سمحتو ليا غادي نذكر الاجهزة للي داعمة لهاد الثغرة حيت عارف مني قريتو ديك تخطي الايكلود ونتوما كاتسناو تعرفو الاجهزة المدعومة هههه واخا اسدي ،
 الاجهزة المدعومة هيا للي كاتخدم بمعالجات A5 حتال A11 
____
* A5 - iPad 2, iPhone 4S, iPad Mini (1st generation)
-
* A5X - iPad (3rd generation)
-
* A6 - iPhone 5, iPhone 5C
-
* A6X - iPad (4th generation)
-
* A7 - iPhone 5S, iPad Air, iPad Mini 2, iPad Mini 3
-
* A8 - Phone 6, iPhone 6 Plus, iPad mini 4
-
* A8X - iPad Air 2
-
* A9 - iPhone 6S, iPhone 6S Plus, iPhone SE, iPad (2017) 5th Generation
-
* A9X - iPad Pro (12.9 in.) 1st generation, iPad Pro (9.7 in.)
-
* A10 - iPhone 7 and iPhone 7 Plus, iPad (2018, 6th generation), iPad (2019, 7th generation)
-
* A10X - iPad Pro 10.5" (2017), iPad Pro 12.9" 2nd Gen (2017)
-
* A11 - iPhone 8, iPhone 8 Plus, and iPhone X
___
هادو الاجهزة لي فيها ثغرة checkm8 بس  الجيلبرك حاليا كيدعم غي من ايفون 5S  حتال iPhone X
يعني جميع الايفونات للي خرجو مورا 5s  حال X,
بالنسبة للموضوع تخطي الايكلود موضوع اخر انشاء الله ، 
________